ՀԱՋԻԶԱԴԵՆ ԴԱՏԱՊԱՐՏԵԼ Է ՓԱՐԻԶԻ ՀԱՅՏԱՐԱՐՈՒԹՅՈՒՆՆԵՐԸ ԱԴՐԲԵՋԱՆՈՒՄ ՃԱՆԱՊԱՐՀՈՐԴՆԵՐԵՐԻ ՀԱՄԱՐ ԵՆԹԱԴՐՅԱԼ ՌԻՍԿԵՐԻ ՄԱՍԻՆ ԵՎ ԿՈՉ Է ԱՐԵԼ ՖՐԱՆՍԻԱԿԱՆ ԿՈՂՄԻՆ ԶԵՐԾ ՄՆԱԼ ԱՆՀԻՄՆ ԵՎ ԿՈՂՄՆԱԿԱԼ ՊՆԴՈՒՄՆԵՐԻՑ
Պաշտոնական Բաքուն դատապարտել է ֆրանսիական կողմի պնդումները Ադրբեջանում «կամայական կալանքի և անարդար դատավարության» ենթադրյալ ռիսկի մասին, որը Փարիզը օգտագործել է որպես հիմք երկիր ճանապարհորդելու մասին նախազգուշացում տալու համար։Հայտարարությունն արել է Ադրբեջանի արտաքին գործերի նախարարության մամուլի ծառայության ղեկավար Այհան Հաջիզադեն՝ ի պատասխան Ֆրանսիայի Եվրոպայի և արտաքին գործերի նախարարության մամուլի քարտուղարի սեպտեմբերի 17-ի հայտարարության։
Հաջիզադեն ընդգծել է, որ Բաքուն կտրականապես մերժում է նման մեղադրանքները։ Նրա խոսքով՝ անընդունելի է Ադրբեջանի օրենսդրությանը համապատասխան անցկացված անհատական քրեական դատավարությունները ներկայացնել որպես քաղաքական նկատառումներով պայմանավորված և փորձել միջամտել երկրի դատական համակարգին։
«Չի կարելի անտեսել, որ Ֆրանսիան, Ադրբեջանի դեմ նման մեղադրանքներ հնչեցնելով, անտեսում է իր սեփական իրավապահ և քրեակատարողական համակարգերի խնդիրները», - նշել է Արտաքին գործերի նախարարության ներկայացուցիչը։
Նա նաև հիշեցրել է Ֆրանսիայի կողմից միջազգային իրավունքի խախտումների, ռասիզմի դրսևորումների, խտրականության և մարդու իրավունքների սահմանափակումների մասին։
«Մենք կոչ ենք անում ֆրանսիական կողմին զերծ մնալ Ադրբեջանի մասին անհիմն և կողմնակալ հայտարարություններից, հարգել մեր երկրի ինքնիշխանությունն ու ներքին գործերը և հրաժարվել երկկողմ հարաբերություններին վնասող մոտեցումներից», - ընդգծել է Հաջիզադեն։