ՄԱԳԴԱԼԵՆԱ ԳՐՈՆՈՆ ԱՄՓՈՓԵՑ ԲԱՔՈՒ ԿԱՏԱՐԱԾ ԱՅՑԸ
Հարավային Կովկասում ԵՄ հատուկ ներկայացուցիչ Մագդալենա Գրոնոն ավարտեց Ադրբեջանում կանոնավոր խորհրդակցությունների հերթական փուլը, որի ընթացքում պաշտոնյաների հետ քննարկեց ԵՄ աջակցությունը Բաքվի և Երևանի միջև խաղաղության գործընթացին: Նա այս մասին հայտարարեց X սոցիալական ցանցում:Ըստ նրա՝ սեպտեմբերի 10-ին Բաքվում հանդիպել է արտաքին գործերի նախարար Ջեյհուն Բայրամովի, Ադրբեջանի նախագահի օգնական Հիքմեթ Հաջիևի և նախագահի հատուկ հանձնարարությունների գծով ներկայացուցիչ Էլչին Ամիրբեկովի հետ:
«Մենք քննարկեցինք Եվրամիության աջակցությունը Ադրբեջանի և Հայաստանի միջև խաղաղության գործընթացին, այդ թվում՝ նախկին հակամարտության հետևանքներին վերաբերող մարդասիրական հարցերը, ինչպես նաև կապի և տարածաշրջանային համագործակցության ոլորտում ջանքերը», - նշեց ԵՄ հատուկ ներկայացուցիչը:
Նա նաև հայտնեց, որ առաջին անգամ մասնակցել է Ադրբեջանի պաշտոնյաների կողմից դիվանագիտական կորպուսի համար կազմակերպված այցին դեպի Ղարաբաղ և Արևելյան Զանգեզուրի նախկին հակամարտության գոտիներ, որտեղ ծանոթացել է տեղում ստեղծված իրավիճակին:
«Մենք հնարավորություն ունեցանք խոսելու տեղական ինքնակառավարման մարմինների ներկայացուցիչների, նախկին ներքին տեղահանված անձանց և լրատվամիջոցների հետ։ Այցելության շրջանակներում մենք նաև այցելեցինք տարբեր մշակութային և կրոնական ժառանգության վայրեր, այդ թվում՝ մզկիթներ և եկեղեցիներ», - գրել է նա։