Թուրալ Գյանջալիև. «Ղարաբաղում բնակվող որոշ հայեր մեզ հետ խաղաղ գոյակցելու ցանկություն են հայտնում Ադրբեջանի միջազգայնորեն ճանաչված սահմանների շրջանակներում»
«Դիմելով Լեռնային Ղարաբաղի ադրբեջանական համայնքին՝ Ղարաբաղում բնակվող որոշ հայեր մեզ հետ խաղաղ գոյակցելու ցանկություն են հայտնում Ադրբեջանի միջազգայնորեն ճանաչված սահմանների շրջանակներում և Ադրբեջանի Հանրապետության Սահմանադրությանը համապատասխան»:
Այս մասին խորհրդարանի նիստում ասել է Միլլի Մեջլիսի պատգամավոր, Լեռնային Ղարաբաղի ադրբեջանական համայնքի ղեկավար Թուրալ Գյանջալիևը:
Նա նշել է, որ Ադրբեջանի Լեռնային Ղարաբաղի մարզի ադրբեջանական համայնքի գործունեությանը ուշադիր հետևողների մեջ կան նաև Ղարաբաղում բնակվող հայեր:
«Ես դիմում եմ այդ հայերին և հայտարարում, որ նրանք պետք է իրենց շուրջը համախմբեն ռացիոնալ մտածող այլ մարդկանց: Նրանք պետք է անցնեն կոնկրետ գործողությունների՝ մոտ ապագայում Լեռնային Ղարաբաղի ադրբեջանական համայնքի հետ խաղաղ գոյատևելու համար: Պետք է նշեմ, որ վերջին շրջանում Լեռնային Ղարաբաղի ադրբեջանական համայնքի գործունեությունն անհանգստացնում է հակառակորդին, ինչը միանգամայն հասկանալի է: Մենք արդեն տեսնում ենք, որ Հայաստանն ու անօրինական ռեժիմը հանդես են գալիս հակասական հայտարարություններով», - ասել է Թուրալ Գյանջալիևը: