ԱՄՆ ՊԵՏՔԱՐՏՈՒՂԱՐ ԷՆԹՈՆԻ ԲԼԻՆԿԵՆԸ ԱԴՐԲԵՋԱՆԻ ՆԱԽԱԳԱՀ ԻԼՀԱՄ ԱԼԻԵՎԻ ՀԵՏ ՔՆՆԱՐԿԵԼ Է ՀԱՅԱՍՏԱՆԻ ՀԵՏ ԽԱՂԱՂՈՒԹՅԱՆ ՀԱՍՆԵԼՈՒ ՀԱՐՑԸ
Մայիսի 11-ին ԱՄՆ պետքարտուղար Էնթոնի Բլինկենը զանգահարել է Ադրբեջանի նախագահ Իլհամ Ալիևին։Հեռախոսազրույցի ընթացքում ԱՄՆ պետքարտուղարը իր շնորհավորանքն է փոխանցել մեծ առաջնորդ Հեյդար Ալիևի ծննդյան 99-րդ տարեդարձի կապակցությամբ։ Նա նշել է, որ վերջերս ԱՄՆ պետքարտուղարության բանագնացը և Հարավային Կովկասի երեք երկրներում գործող ԱՄՆ դեսպանները այցելել են Ադրբեջան և այցի ընթացքում արդյունավետ քննարկումներ ունեցել։
ԱՄՆ պետքարտուղարն ընդգծել է, որ աջակցում է Ադրբեջանի և Հայաստանի միջև բանակցություններին և, մասնավորապես, խաղաղության պայմանագրի կնքմանը և հույս հայտնել, որ դա կնպաստի տարածաշրջանում կայուն խաղաղության ապահովմանը։
Էնթոնի Բլինկենը նաև ընդգծել է ԱՄՆ-ի պատրաստակամությունը՝ աջակցելու Ադրբեջանի և Հայաստանի միջև սահմանների սահմանագծման և սահմանազատման գործընթացին, հաղորդակցությունների բացմանը։
Նախագահ Իլհամ Ալիևը շնորհակալություն է հայտնել շնորհավորանքների համար և հայտարարել, որ Հայաստանի հետ հարաբերությունները կարգավորելու համար Ադրբեջանի առաջարկած 5 սկզբունքներն ընդունվել են Երևանի կողմից, և Բաքուն պատրաստ է խաղաղ պայմանագրի շուրջ բանակցություններ սկսել այդ սկզբունքների հիման վրա։ Իլհամ Ալիևը նաև նշել է, որ Ադրբեջանը որոշել է ազգային հանձնաժողովի կազմը սահմանագծման և սահմանազատման գործընթացը սկսելու համար և ընդգծել տրանսպորտային հաղորդակցությունների բացման կարևորությունը։
Կողմերն անդրադարձել են նաև Հայաստանի և Ադրբեջանի միջև հումանիտար օրակարգի հարցերին։ Հեռախոսազրույցի ընթացքում քննարկվել են նաև էներգետիկ անվտանգության հարցեր։ Մտքերի փոխանակություն է տեղի ունեցել երկու երկրների միջև երկխոսության ընդլայնման հնարավորությունների, Ադրբեջանում ժողովրդավարացման գործընթացի շուրջ, ընդգծվել է միջկառավարական հանձնաժողովի դերը երկկողմ կապերի զարգացման գործում։