ՀԻՔՄԵԹ ՀԱՋԻԵՎ. ՂԱՐԱԲԱՂԻ ՀԱՅԵՐԻ ԻՐԱՎՈՒՆՔՆԵՐԻ ԵՎ ԱՆՎՏԱՆԳՈՒԹՅԱՆ ՀԱՐՑԸ ԶՈՒՏ ԱԴՐԲԵՋԱՆԻ ՆԵՐՔԻՆ ԽՆԴԻՐՆ Է, ԵՎ ԲԱՔՈՒՆ ՉԻ ՊԱՏՐԱՍՏՎՈՒՄ ԻՆՔՆԻՇԽԱՆՈՒԹՅԱՆ ՎԵՐԱԲԵՐՅԱԼ ՀԱՐՑԵՐԸ ՔՆՆԱՐԿԵԼ ՈՐԵՎԷ ԱՅԼ ԿՈՂՄԻ ՀԵՏ
Բաքուն անընդունելի է համարում Հայաստանի իշխանությունների՝ խաղաղ համաձայնագրում Ղարաբաղի վերաբերյալ կետ ներառելու փորձերը: Այս մասին Report-ին տված հարցազրույցում հայտարարել է Ադրբեջանի նախագահի՝ անվտանգության հարցերով օգնական Հիքմեթ Հաջիևը։Նրա խոսքով՝ Ադրբեջանի նախագահը բազմիցս նշել է, որ Երևանի և Բաքվի միջև խաղաղության պայմանագրի հետ կապված հարցերը պետք է առանձին լուծվեն և կապված չլինեն Ղարաբաղի բնակչությանը վերաբերող հարցերին։
«Հայաստանն ի սկզբանե փորձել է ղարաբաղյան հարցը ներառել խաղաղության համաձայնագրում, սակայն այդ մոտեցումն անընդունելի է Ադրբեջանի համար։ Ղարաբաղի հայերի իրավունքների և անվտանգության հարցը զուտ Ադրբեջանի ներքին խնդիրն է, և Բաքուն չի պատրաստվում ինքնիշխանության վերաբերյալ հարցերը քննարկել որևէ այլ կողմի հետ», - հայտարարել է Հաջիևը:
Նա նաև հավելել է, որ Ղարաբաղում ապրող հայերի իրավունքներն ու անվտանգությունը կորոշվեն Ադրբեջանի Սահմանադրությանը և օրենքներին համապատասխան։