ԱԴՐԲԵՋԱՆԻ ԵՎ ԹՈՒՐՔԻԱՅԻ ՆԱԽԱԳԱՀՆԵՐ ԻԼՀԱՄ ԱԼԻԵՎՆ ՈՒ ՌԵՋԵՓ ԹԱՅԻՓ ԷՐԴՈՂԱՆՆ ԸՆԴԳԾԵԼ ԵՆ, ԹԵ ԿԱՐԵՎՈՐ Է, ՈՐ ՀԱՅԱՍՏԱՆԸ ԼԻՈՎԻՆ ԻՐԱԳՈՐԾԻ ՂԱՐԱԲԱՂՅԱՆ ՎԵՐՋԻՆ ՊԱՏԵՐԱԶՄԻՑ ՀԵՏՈ ԵՌԱԿՈՂՄ ՀԱՅՏԱՐԱՐՈՒԹՅԱՄԲ ՍՏԱՆՁՆԱԾ ԲՈԼՈՐ ՊԱՐՏԱՎՈՐՈՒԹՅՈՒՆՆԵՐԸ
Անկարայում Ադրբեջանի և Թուրքիայի նախագահներ Էրդողանի և Ալիևի միջև շուրջ չորս ժամ շարունակված հանդիպումից հետո պաշտոնական Բաքուն հայտարարել է, թե օրակարգում է եղել հայ-ադրբեջանական հարաբերությունների կարգավորման հարցը։«Ալիևն ու Էրդողանը ընդգծել են Զանգեզուրի միջանցքի բացման կարևորությունը, և այն հեռանկարները, որ այն ստեղծում է տարածաշրջանի համար, և այդ կապակցությամբ Կարս-Նախիջևան երկաթուղու կառուցումը», - հայտարարել է Ադրբեջանի նախագահական նստավայրը։
Ըստ հաղորդագրության, Ալիևն ու Էրդողանն ընդգծել են, թե կարևոր է, որ Հայաստանը լիովին իրագործի ղարաբաղյան վերջին պատերազմից հետո եռակողմ հայտարարությամբ ստանձնած բոլոր պարտավորությունները։ Անդրադարձ է եղել նաև հայ-թուրքական պատվիրակությունների միջև շփումներին, ինչպես նաև ուկրաինական ճգնաժամին։
«Անդրադարձ է եղել թուրք-ադրբեջանական համագործակցությանը էներգետիկ ոլորտում, քննարկվել են հավելյալ գազամատակարարման հնարավորությունները Թուրքիային, ինչպես նաև Թուրքիայի տարածքով՝ Եվրոպային»,- հաղորդել է պաշտոնական Բաքուն, հավելելով՝ Ալիևն ու Էրդողանը քննարկել են նաև Իգդիր-Նախչըվան գազատարի կառուցման հարցը, ինչի համար միջոցներ են նախատեսված Ադրբեջանի բյուջեում։