ՀԱՅԱՍՏԱՆՑԻՆԵՐԻ 70 ՏՈԿՈՍԸ ԿՈՂՄ Է ԹՈՒՐՔԻԱՅԻ ՀԵՏ ՀԱՐԱԲԵՐՈՒԹՅՈՒՆՆԵՐԻ ՀԱՍՏԱՏՄԱՆԸ
Հայաստանցիների ճնշող մեծամասնությունը՝ 70 տոկոսը կողմ է Թուրքայի հետ հարաբերությունների հաստատմանը՝ պայմանով, որ Անկարան չխոչընդոտի ղարաբաղյան կարգավորմանը։ Միևնույն ժամանակ, ԱՄՆ Միջազգային հանրապետական ինստիտուտի (IRI) վերջին հարցման արդյունքների համաձայն, հարցվածների 90 տոկոսը կարծիք է հայտնել, որ Հայաստանի համար քաղաքական և անվտանգային ամենամեծ սպառնալիքը հենց Թուրքիան է ներկայացնում։Միջազգային հանրապետական ինստիտուտի հերթական հարցումն անցկացվել է անցած տարեվերջին՝ 1512 քաղաքացու շրջանում։ Անվտանգության, արտաքին և ներքին քաղաքականության, պետական ինստիտուտների գործունեության մասին տարաբնույթ հարցերը ամփոփած ուսումնասիրության հեղինակները եզրակացրել են, որ հայաստանցիները առաջնային են համարում տարածքային և սահմանային անվտանգության խնդիրները։
«Ղարաբաղյան վերջին պատերազմն ու տարածաշրջանում ռազմական բախումների պատմությունն աչքի առաջ ունենալով, հասկանալի է, որ հայաստանցիներն անհանգստացած են ազգային անվտանգությամբ և սահմանային խնդիրներով։ Հայաստանցիները ցանկանում են տեսնել տարածքային երկարամյա այս խնդիրների հանգուցալուծումը», - ասել է IRI-ի եվրասիական բաժնի ղեկավար Սթիվեն Նիքսը։