ԱԴՐԲԵՋԱՆԻ ԱԳՆ. ԲԱՔՈՒՆ ՊԱՏՐԱՍՏ Է ՀԱՄԱԳՈՐԾԱԿՑԵԼ ԽԱՂԱՂՕՎԿԻԱՆՈՍՅԱՆ ԴԱՇԻՆՔԻ ԵՐԿՐՆԵՐԻ ՀԵՏ
Տեղի է ունեցել Խաղաղօվկիանոսյան դաշինքի միջազգային համագործակցության III ֆորումը։Այս մասին ասված է Ադրբեջանի արտաքին գործերի նախարարության հաղորդագրության մեջ։
Նշվում է, որ «Կայուն սոցիալ-տնտեսական տարածաշրջանային աշխուժացում. միջազգային համագործակցության ներդրումը» թեմայով ֆորումին որպես մշտական և դիտորդ անդամներ մասնակցել են աշխարհի ավելի քան 60 երկրների ներկայացուցիչներ, ներառյալ՝ Ադրբեջանի ԱԳՆ-ի հատուկ հանձնարարություններով դեսպան Էլշադ Իսկենդերովը:
Ելույթ ունենալով առցանց ֆորումում՝ Էլշադ Իսկենդերովը մասնակիցներին տեղեկացրել է Հյուսիս-Հարավ և Արևելք-Արևմուտք ուղղություններով Ադրբեջանի տրանսպորտային և տարանցիկ հնարավորությունների մասին։
Խոսելով ազատագրված տարածքներում իրականացվող լայնածավալ վերականգնողական աշխատանքների մասին՝ դեսպանն ընդգծել է, որ Ադրբեջանը, որը ներկայացված է կազմակերպությունում որպես դիտորդ անդամ, պատրաստ է այդ ոլորտում համագործակցել դաշինքի երկրների հետ։
Միջոցառման մասնակիցներն իրենց ելույթում հետաքրքրություն են հայտնել Ադրբեջանի ազատագրված տարածքների վերականգնման ոլորտում համագործակցելու հարցում: