ԻԼՀԱՄ ԱԼԻԵՎ. ՖՐԱՆՍԻԱՆ ՇԱՏ ԿՈՐԾԱՆԱՐԱՐ ԴԵՐ Է ԽԱՂՈՒՄ ՀԱՐԱՎԱՅԻՆ ԿՈՎԿԱՍՈՒՄ։ ՓԱՍՏՈՐԵՆ, ՀԱՅԱՍՏԱՆԸ ԴԱՐՁԵԼ Է ՖՐԱՆՍԻԱԿԱՆ ԿԱՌԱՎԱՐՈՒԹՅԱՆ ԽԱՄԱՃԻԿԸ, ԵՎ ԴԱ ԿԱՐՈՂ Է ԼՈՒՐՋ ՍՊԱՌՆԱԼԻՔ ԴԱՌՆԱԼ ՏԱՐԱԾԱՇՐՋԱՆԱՅԻՆ ԿԱՅՈՒՆՈՒԹՅԱՆ ՀԱՄԱՐ
Մենք սպասում ենք Հայաստանի պատասխանին առաջարկի վերաբերյալ մեր մեկնաբանություններին։ Մենք մի քանի անգամ առաջարկներ ենք փոխանակել խաղաղության պայմանագրի նախագծի վերաբերյալ, սակայն այժմ սեպտեմբերի 11-ից ավելի քան երկու ամիս սպասում ենք, որպեսզի Հայաստանի կառավարությունը պատասխանի մեզ։ Կցանկանայինք իմանալ նրանց կարծիքը այս մեկնաբանությունների վերաբերյալ։ Բայց մենք այդպես էլ պատասխան չստացանք։Այս մասին, նոյեմբերի 20-ին Բաքվում, Իրաքի Հանրապետության նախագահ Աբդել Լաթիֆ Ջամալ Ռաշիդի հետ համատեղ ասուլիսի ժամանակ, հայտարարել է Ադրբեջանի նախագահ Իլհամ Ալիևը։
Նշելով, որ պատճառն այն է, որ հայերը վատ խորհուրդներ են ստանում, մասնավորապես Ֆրանսիայից, պետության ղեկավարն ընդգծել է. «Ֆրանսիան շատ կործանարար դեր է խաղում Հարավային Կովկասում։ Փաստորեն, Հայաստանը դարձել է ֆրանսիական կառավարության խամաճիկը, և դա կարող է լուրջ սպառնալիք դառնալ տարածաշրջանային կայունության համար։ Մեզ ոչ մի պատերազմ պետք չէ: Մենք կռվեցինք մեր տարածքում, վերականգնեցինք արդարությունն ու միջազգային իրավունքը։ Բայց Հայաստանի իշխանությունն ու քաղաքական իսթեբլիշմենթը մտածում են ռևանշի մասին։ Եվ ֆրանսիական կառավարության սխալ հաղորդագրությունները փաստացի պատրանք են ստեղծում Հայաստանի իշխանության, և, հնարավոր է, նաև հայ հասարակական կարծիքի մոտ, որ նրանք կարող են կրկին ռազմական ագրեսիա սկսել Ադրբեջանի դեմ։ Հայաստանին զինելը, որով Ֆրանսիան այդքան հպարտանում է և հրապարակավ հայտարարում, չի օգնի Հայաստանին, եթե նա որոշի նոր պատերազմ սկսել։ Արդյունքը նույնն է լինելու, և ոչ ոք նրանց չի օգնի։ Միթե՞ Ֆրանսիան օգնել է նրանց երեք տարի առաջ։ Ոչ. Երկու ամիս առաջ նրանց օգնե՞լ են։ Ոչ: Ի՞նչ կարող են նրանք այստեղ անել: Ոչինչ։ <…> Ուստի կարծում եմ, որ որքան շուտ Հայաստանից պատասխան ստանանք մեր մեկնաբանություններին, այնքան լավ»։