ԻԼՀԱՄ ԱԼԻԵՎ. ՂԱՐԱԲԱՂՅԱՆ ԵՐԿՐՈՐԴ ՊԱՏԵՐԱԶՄԻ ԺԱՄԱՆԱԿ ՀԱԴՐՈՒԹԻ ԳՈՐԾՈՂՈՒԹՅՈՒՆԸ ՀԱՏՈՒԿ ՆՇԱՆԱԿՈՒԹՅՈՒՆ ՈՒՆԻ ԻՆՉՊԵՍ ՌԱԶՄԱԿԱՆ, ԱՅՆՊԵՍ ԷԼ ՌԱԶՄԱՎԱՐԱԿԱՆ ՏԵՍԱՆԿՅՈՒՆԻՑ
Ղարաբաղյան երկրորդ պատերազմի ժամանակ իրականացված գործողությունների թվում Հադրութի գործողությունը հատուկ նշանակություն ունի ինչպես ռազմական, այնպես էլ ռազմավարական տեսանկյունից, հայտարարել է Ադրբեջանի նախագահը:«Այդ գործողության հաջող ավարտը մեզ թույլ տվեց հասնել մեր նպատակին՝ Ղարաբաղի ազատագրմանը», - ասել է Իլհամ Ալիևը Խոջավենդի շրջանի հասարակայնության հետ հանդիպման ժամանակ:
Իլհամ Ալիևն ընդգծել է, որ Հադրութի դիրքն առանձնահատուկ նշանակություն ունի ռազմավարական առումով, քանի որ լեռնային տարածք է. - «Ավանը շրջապատող բարձունքները թույլ են տալիս վերահսկել ընդարձակ տարածք: Հադրութը գրավելը շատ բարդ էր ռազմական տեսանկյունից: Միաժամանակ, Հադրութի գրավմամբ նոր հնարավորություններ բացվեցին մեր հետագա ծրագրերի համար»:
Ադրբեջանի նախագահի փոխանցմամբ՝ Հադրութի շուրջ կատաղի մարտեր են ընթացել մի քանի օր»:
Ալիևի խոսքով՝ Հադրութի գործողության մեկ այլ նշանակությունն էր այն, որ Հայաստանի ղեկավարությունը և հայկական բանակը չէին սպասում ադրբեջանական բանակի առաջխաղացում Հադրութի ուղղությամբ. - «Նրանք կարծում էին, որ մենք կշարժվենք Ֆիզուլիի ուղղությամբ: [...] Հադրութի գրավումն իրոք պահանջում էր շատ մեծ ինքնազոհություն և պրոֆեսիոնալիզմ: Իրականացնելով այդ գործողությունը՝ մենք ևս մեկ անգամ ցույց տվեցինք Հայաստանին և ամբողջ աշխահին մեր ուժը»:
Ադրբեջանի նախագահը պնդել է, որ Հադրութի կորուստը Հայաստանի մոտ «հսկայական բարոյա-հոգեբանական ցնցում է առաջ բերել», և հայկական կողմը երկար ժամանակ թաքցնում էր տեղի ունեցածը:
Նա հայտնել է, որ Հադրութի հետ կապված մեծ ծրագրեր կան, այս վաերը վերածվելու է «միջազգային մշակույթի և զբոսաշրջության կենտրոնի»:
Ադրբեջանի նախագահը նաև Հադրութում կառուցվելիք մզկիթի և այլ շինությունների հիմքերն է գցել: