ԱԴՐԲԵՋԱՆԻ ՆԱԽԱԳԱՀ ԻԼՀԱՄ ԱԼԻԵՎԸ ՀԱՅՏԱՐԱՐԵԼ Է, ՈՐ ՉԻ ԱՌԱՐԿՈՒՄ ՀԱՅԱՍՏԱՆԻ ՎԱՐՉԱՊԵՏ ՆԻԿՈԼ ՓԱՇԻՆՅԱՆԻ ՀԵՏ ՀԱՆԴԻՊՄԱՆ ԴԵՄ, ԴՐԱ ԵԱՀԿ ՄԻՆՍԿԻ ԽՄԲԻ ԿՈՂՄԻՑ ԿԱԶՄԱԿԵՐՊՎԵԼՈՒ ԴԵՊՔՈՒՄ
Ադրբեջանի նախագահ Իլհամ Ալիևը հայտարարել է, որ չի առարկում Հայաստանի վարչապետ Նիկոլ Փաշինյանի հետ հանդիպման դեմ, դրա ԵԱՀԿ Մինսկի խմբի կողմից կազմակերպվելու դեպքում:«Պատերազմն ավարտվել է, տարածաշրջանը կանխատեսելիության և կայունության կարիք ունի: Անցած շաբաթ Ադրբեջանի և Հայաստանի արտգործնախարարների՝ Նյու Յորքում հանդիպումը լավ ցուցանիշ է այն բանի, որ երկխոսությունը կարելի է վերսկսվել և խաղաղ լուծում փնտրել: Հուսով եմ, որ հանդիպումները կդառնան՝ Ադրբեջանի և Հայաստանի միջև հարաբերությունների կարգավորման գործընթացի, հարավկովկասյան տարածաշրջանում համագործակցության սկիզբը», - France 24-ին տված հարցազրույցում ասել է Իլհամ Ալիևը:
Ադրբեջանի նախագահը հիշեցրել է, որ հնարավորություն է ունեցել հանդիպել Հայաստանի վարչապետի հետ՝ Ադրբեջանի, Ռուսաստանի և Հայաստանի առաջնորդների եռակողմ հանդիպմանը, որը տեղի է ունեցել հունվարին Մոսկվայում՝ ՌԴ նախագահ Վլադիմիր Պուտինի նախաձեռնությամբ:
«Այս հանդիպումը նվիրված էր հետկոնֆլիկտային համագործակցությանը: Մենք հնարավորություն չունեցանք հանդիպելու (Հայաստանի վարչապետի հետ - խմբ.), այդ թվում՝ համավարակի և այլ պատճառներով: Ադրբեջանը երբեք չի հրաժարվել ամենաբարձր մակարդակով երկխոսությունից: Այդ շփումները հնարավորություն են տալիս պարզաբանել հարցերը: Մեր դիրքորոշումը հստակ է. Հակամարտությունը լուծված է, հետ գնալու կարիք չկա, անհրաժեշտ է նայել առաջ», - ընդգծել է Ադրբեջանի ղեկավարը:
Լրագրողի այն հարցին, թե նա պատրա՞ստ է հանդիպել Հայաստանի վարչապետի հետ, Իլհամ Ալիևը պատասխանել է, որ «երկու առաջնորդների շփումները սովորաբար անցկացվում էին ԵԱՀԿ Մինսկի խմբի հովանու ներքո»: «Եթե ԵԱՀԿ Մինսկի խումբը հանդես գա նման հանդիպում կազմակերպելու նախաձեռնությամբ, մենք դեմ չենք լինի», - ամփոփել է Իլհամ Ալիևը: