ԱԴՐԲԵՋԱՆԸ ՍԻՐԻԱՅՈՒՄ ԿԿԱՌՈՒՑԻ ՄՈՏ 10 ՆՈՐ ԴՊՐՈՑ
Ադրբեջանը կօժանդակի Սիրիայում ավերված և վնասված դպրոցների կառուցմանը և կապիտալ վերանորոգմանը։Այս մասին հայտնել է Ադրբեջանի գիտության և կրթության նախարարությունը։
Նշվել է, որ փետրվարի 17-ին Ռաբաթում գտնվող ICESCO-ի կենտրոնակայանում ստորագրվել է ռազմավարական գործընկերության համաձայնագիր՝ Ադրբեջանի Հանրապետության գիտության և կրթության նախարարության, Սիրիայի Արաբական Հանրապետության կրթության նախարարության և Իսլամական աշխարհի կրթական, գիտական և մշակութային կազմակերպության միջև՝ Սիրիայում կրթական ենթակառուցվածքների վերականգնման վերաբերյալ։
Փաստաթուղթը ստորագրել են Ադրբեջանի Հանրապետության գիտության և կրթության նախարար Էմին Ամրուլլաևը, Սիրիայի Արաբական Հանրապետության կրթության նախարար Մոհամմեդ Աբդուլռահման Թուրքոն և ICESCO-ի գլխավոր տնօրեն Սալիմ բին Մոհամմեդ ալ-Մալիքը։
Փաստաթղթի համաձայն՝ Ադրբեջանը կաջակցի Սիրիայում կրթական ենթակառուցվածքների վերականգնմանը՝ կառուցելով մոտ 10 նոր դպրոց և վերանորոգելով մոտ 100 վնասված դպրոց։
Ստորագրման արարողության ժամանակ ելույթ ունենալով՝ Էմին Ամրուլլաևը ընդգծել է, որ այս նախաձեռնության նպատակն է Սիրիայի Արաբական Հանրապետությունում երեխաների և երիտասարդների համար ստեղծել անվտանգ և ժամանակակից կրթական միջավայր: