ՔԱՂԱՔԱԳԵՏ ԱԹԱՆԵՍՅԱՆ. ՍԱՀՄԱՆԱԶԱՏՈՒՄԸ ԱՌԱՎԵԼԱԳՈՒՅՆ ՕԳՈՒՏՆ Է, ՈՐ ԿԱՐՈՂ Է ՍՏԱՆԱԼ ՀԱՅԱՍՏԱՆԸ
«Այստեղ կցանկանայի ընդգծել ներքին իրավիճակը և ներհայկական ընկալումը։ Այստեղ, ցավոք, մենք տեսնում ենք շատ ոչ պրոֆեսիոնալ մոտեցում, այդ թվում՝ քաղաքագետների և որոշ քաղաքական շրջանակների կողմից։ Նրանք ասում են՝ Խորհրդային Միության տարիներին սահմաններ չեն եղել, ուստի Ալմաթիի հռչակագիրը ընդամենը հռչակագիր է»։Այս մասին հայկական լրատվամիջոցների հետ զրույցում ասել է քաղաքագետ Վահրամ Աթանեսյանը՝ մեկնաբանելով Հայաստանի և Ադրբեջանի միջև սահմանազատման և սահմանագծման գործընթացը։
«Հիմա հայկական իրականության մեջ մի դիսկուրս է ընթանում, որ Ալմաթիի հռչակագիրը ամենևին էլ հիմք չէ ասելու, որ Հայաստանի և Ադրբեջանի միջև սահման կա։ Ես ասում եմ՝ այս դեպքում ինձ ցույց տվեք մեկ այլ փաստաթուղթ, որի հիման վրա Հայաստանը պետք է սահմանազատի և սահմանագծի Ադրբեջանի հետ սահմանը։ Նման իրավական հիմք չկա, բացառությամբ Ալմաթիի հռչակագրի և ՄԱԿ-ի կանոնադրության, որոնք Հայաստանն ու Ադրբեջանը ստորագրել են որպես Ալմաթի քաղաքում անկախություն ձեռք բերած երկրներ հենց այս հռչակագրի համաձայն։ Սա սկզբունքորեն բխում է Հայաստանի շահերից, և Փաշինյանի և ընդդիմության միջև խնդիր չպետք է լինի։ Իրավիճակն այնպիսին է, որ սա առավելագույն օգուտն է, որ այս պահին կարող է ստանալ Հայաստանը»,- ասել է քաղաքագետը։