ԱԴՐԲԵՋԱՆԻ ԱԳՆ. ՓԱՇԻՆՅԱՆԻ ՑԱՆԿԱԼԻՆ ԻՐԱԿԱՆՈՒԹՅԱՆ ՓՈԽԱՐԵՆ Է ՆԵՐԿԱՅԱՑՆՈՒՄ
Հայաստանի վարչապետ Նիկոլ Փաշինյանի հայտարարությունը Արդարադատության միջազգային դատարանի 2023 թվականի փետրվարի 23-ի որոշման վերաբերյալ հակասում է դատարանի որոշմանը և հայկական կողմի՝ ցանկալին իրականության փոխարեն ներկայացնելու հերթական փորձն է։Ադրբեջանի ԱԳՆ-ից հայտնել են, որ նախ պետք է նշել, որ Փաշինյանի այն խոսքերը, թե իբր դատարանը արձանագրել է Լաչինի ճանապարհի փակ լինելը, ոչ մի կերպ չի համընկնում դատարանի ժամանակավոր միջոցների որոշման տեքստի հետ, և որոշման մեջ չի նշում ճանապարհի փակ լինելու մասին:
«Հայաստանի վարչապետը չի կարողանում հաշտվել դատարանի կողմից Հայաստանի երկու հիմնական հայցերի մերժման հետ՝ այն մասին, որ Խանքենդի-Լաչին ճանապարհին մի խումբ բնապահպան ակտիվիստների բողոքի ակցիան իբր կազմակերպվել է Ադրբեջանի կառավարության կողմից, և որ Ադրբեջանը իբր խոչընդոտում է գազամատակարարմանը և հայ բնակչությանը կոմունալ ծառայությունների մատուցմանը։
Լաչինի ճանապարհի հետ կապված Ադրբեջանի պարտավորությունների վերաբերյալ Փաշինյանի մեկնաբանությունից պարզ է դառնում, որ նա կարծես դեռ չի հասկանում 2020 թվականի նոյեմբերի 10-ի եռակողմ հայտարարության դրույթի իմաստը, որում ասվում է, որ Ադրբեջանի Հանրապետությունը երաշխավորում է քաղաքացիների, տրանսպորտային միջոցների և բեռների տեղաշարժի անվտանգությունը Լաչինի ճանապարհի երկու ուղղություններով: Ադրբեջանի կողմից Լաչինի ճանապարհով երթևեկության անվտանգության երաշխիքը չի նշանակում, որ մենք աչք ենք փակելու ճանապարհի չարաշահման վրա, մենք բազմիցս հայտարարել ենք, որ դա թույլ չենք տա։
Ընդհանուր առմամբ, անհիմն պնդումների առնչությամբ, որ Արդարադատության միջազգային դատարանն իբր բավարարել է Հայաստանի միջնորդությունը, հարկ է նշել, որ դատարանի պահանջը չի համընկնում Հայաստանի պահանջի հետ: Դատարանի որոշման մեջ նշված է, որ «Ադրբեջանը պետք է միջոցներ ձեռնարկի իր պարտավորությունների շրջանակներում», այլ ոչ թե «ապահովի անխոչընդոտ տեղաշարժ»։
Դատարանը մերժել է նաև Հայաստանի այն պնդումները, որ ճանապարհին երթևեկությունը պետք է լինի «ազատ»։ Այսպիսով, դատարանը, պաշտպանելով Ադրբեջանի դիրքորոշումը, մերժել է Հայաստանի պահանջը՝ Լաչինի ճանապարհով երթևեկությունն «ազատ», այսինքն՝ առանց որևէ վերահսկողության իրականացնելու վերաբերյալ»,- ասված է ԱԳՆ հաղորդագրության մեջ։