ՀՀ ՎԱՐՉԱՊԵՏ ՆԻԿՈԼ ՓԱՇԻՆՅԱՆ. ՄԵՆՔ ԿԱՐԾՈՒՄ ԵՆՔ, ՈՐ ԴԵՄԱՐԿԱՑԻԱՅԻ ԵՎ ԴԵԼԻՄԻՏԱՑԻԱՅԻ ՀԱՆՁՆԱԺՈՂՈՎԸ ՊԵՏՔ Է ՕՐ ԱՌԱՋ ՁԵՎԱՎՈՐՎԻ, ԵՎ ԴԱ ՇԱՏ ԿԱՐԵՎՈՐ Է, ԻՆՉՔԱՆ ՇՈՒՏ, ԱՅՆՔԱՆ ԱՎԵԼԻ ԼԱՎ
Նախօրեին ՀՀ վարչապետ Նիկոլ Փաշինյանը առցանց ասուլիսին հայտարարել է, որ սահմանազատման ու սահմանագծման գործընթացի վերաբերյալ Երևանի առաջարկները ոչ թե հենց դեմարկացիայի մասին են:«Մեր առաջարկը վերաբերում է հենց անվտանգության միջոցառումներին, ինչի մեջ գլոբալ առումով ոչ մի գաղտնիք չկա: Դրանք այն առաջարկների մասին են, որոնց մասին ես խոսել եմ դեռևս մայիսին` հայելային ետքաշման առաջարկը»:
Վարչապետը շեշտեց` հայկական կողմը չի փորձել փաստաթուղթ ձևավորել, որն արտահայտում է զուտ Հայաստանի տեսակետը. «Հիմա քննարկումները շարունակվում են, և մենք չենք ուզում շատ դետալներ բացահայտելով խաթարենք աշխատանքային քննարկումը: Մենք կարծում ենք, որ դեմարկացիայի և դելիմիտացիայի հանձնաժողովը պետք է օր առաջ ձևավորվի, և դա շատ կարևոր է, ինչքան շուտ, այնքան ավելի լավ»:
Երասխ-Ջուլֆա-Օրդուբադ-Մեղրի-Հորադիզ երկաթուղու գործարկման մասին Հայաստանի ղեկավարն ասաց, որ նախնական գնահատականով` 205 միլիոն դոլարի ներդրման մասին է, և ՀՀ-ի համար դա շատ ծանր ու մեծ բեռ չէ. «Այսինքն` սա այն պարագան չէ, որ կարող է ֆինանսական խնդիր առաջացնել: Գործնականում համաձայնել ենք, երբ մեզ հաջողվի այդ համաձայնությունը թղթի վրա արձանագրել, գործնականում այդ երկաթուղու կառուցման նախապատրաստական աշխատանքները սկսված են»:
Հայաստանի արտգործնախարար Արարատ Միրզոյանն Անթալիայի դիվանագիտական ֆորումին մասնակցելու հրավեր է ստացել: Հայաստանի վարչապետից լրատվամիջոցները հետաքրքրվել էին` կընդունի՞ հայկական կողմն այս հրավերը:
«Հայաստան-Թուրքիա հարաբերությունների կարգավորման ֆորմատ է ձևավորվել, և արդեն իսկ տեղի է ունեցել առաջին հանդիպումը ներկայացուցիչների: Ես կարծում եմ, որ եթե այս դինամիկան պահպանվի, շատ մեծ է հավանականությունը, որ ՀՀ-ն այդ ֆորումին մասնակցելու հրավերը կընդունի: Իհարկե, ամեն ինչ կախված է այդ պահին առկա իրավիճակից, բայց համենայն դեպս առաջին հանդիպումից հետո մեծանում է հավանականությունը, որ Հայաստանը կընդունի այդ հրավերը», - պատասխանեց Փաշինյանը:
Ինչ վերաբերում է Ցեղասպանության ճանաչմանը, նա շեշտեց, որ իրենց դիրքորոշումն արտահայտել են Կառավարության ծրագրում` ավելացնելով, թե Հայաստանի Հանրապետությունը երբեք Հայ դատի քաղաքականություն չի վարել:
«Ցեղասպանության ճանաչման գործընթացի լոկոմոտիվը միշտ էլ եղել է Սփյուռքն ու Սփյուռքի կազմակերպությունները», - ասաց Փաշինյանը: