ԻԼՀԱՄ ԱԼԻԵՎՆ ԷՆԹՈՆԻ ԲԼԻՆՔԵՆԻՆ. ԱՊՐԻԼԻ 5-ԻՆ ՆԱԽԱՏԵՍՎԱԾ ՀԱՆԴԻՊՈՒՄԸ ԿՍՐԻ ԼԱՐՎԱԾՈՒԹՅՈՒՆԸ ՀԱՐԱՎԱՅԻՆ ԿՈՎԿԱՍՈՒՄ ԵՎ ՆՈՐ ԲԱԺԱՆԱՐԱՐ ԳԾԵՐ ԿՍՏԵՂԾԻ՝ ԽԱՂԱՂՈՒԹՅՈՒՆ ՀԱՍՏԱՏԵԼՈՒ ՓՈԽԱՐԵՆ
ԱՄՆ Պետքարտուղար Էնթոնի Բլինքենն ու Ադրբեջանի նախագահ Իլհամ Ալիևն ապրիլի 3-ին տեղի ունեցած հեռախոսազրույցի ընթացքում քննարկել են Ադրբեջանի և Հայաստանի միջև խաղաղ գործընթացն առաջ մղելու կարևորությունը, «որը տնտեսական օգուտ կբերի ողջ տարածաշրջանին», ասված է Պետդեպարտամենտի տարածած հաղորդագրությունում։Իլհամ Ալիևը հայտարարել է, որ բոլորովին անհիմն են այն մեղադրանքները, որոնք հնչում են Արևմուտքում Ադրբեջանի կողմից Հայաստանի վրա հարձակվելու մտադրության մասին, հայտնում է Ադրբեջանի նախագահի մամուլի ծառայությունը։
Նախագահը նշել է, որ խաղաղության համաձայնագրի տեքստի շուրջ Բեռլինում ԱԳ նախարարների կողմից անցկացված քննարկումները շահավետ են գործընթացն առաջ մղելու տեսանկյունից և ընդգծել բանակցություններն արագացնելու անհրաժեշտությունը։ Նա ընդգծել է Ադրբեջանի հավատարմությունը 2022 թվականին Պրահայի հանդիպման ժամանակ ընդունված հայտարարությանը և Ալմաթիի հռչակագրին։
Ադրբեջանի նախագահը անդրադարձել է նաև Ֆրանսիայի արտաքին գործերի նախարարի հայտարարությանը, թե Ադրբեջանը կասկածի տակ է դնում Հայաստանի տարածքային ամբողջականությունը և նշել՝ նա ստում է:
Էնթոնի Բլինքենն, անդրադառնալով ապրիլի 5-ին Բրյուսելում Հայաստանի վարչապետի, Միացյալ Նահանգների պետքարտուղարի ու Եվրոպական հանձնաժողովի նախագահի Բրյուսելում նախատեսված հանդիպման վերաբերյալ Իլհամ Ալիևի մտահոգություններին, ընդգծել է, որ այն ուղղված չէ Ադրբեջանի դեմ:
Ադրբեջանի նախագահն իր հերթին նշել է, որ ապրիլի 5-ին նախատեսված հանդիպումը կսրի լարվածությունը Հարավային Կովկասում և նոր բաժանարար գծեր կստեղծի՝ խաղաղություն հաստատելու փոխարեն: