ԻԼՀԱՄ ԱԼԻԵՎ. ՄԵՆՔ ՎԵՐԱԴԱՐՁՐԻՆՔ ՄԵՐ ՀՈՂԵՐԸ, ՎԵՐԱԿԱՆԳՆԵՑԻՆՔ ՄԵՐ ՏԱՐԱԾՔԱՅԻՆ ԱՄԲՈՂՋԱԿԱՆՈՒԹՅՈՒՆԸ ԵՎ ՄԻԱԺԱՄԱՆԱԿ ՎԵՐԱԿԱՆԳՆԵՑԻՆՔ ՄԵՐ ԱՐԺԱՆԱՊԱՏՎՈՒԹՅՈՒՆԸ
«20 տարի առաջ սկսելով կատարել իմ պաշտոնեական պարտականությունները որպես նախագահ՝ ես իմ առջև թիվ մեկ խնդիր դրեցի, որ այն ժամանակ օկուպացիայի տակ գտնվող բոլոր տարածքներում, բոլոր հողերում, բոլոր քաղաքներում ու գյուղերում բարձրացվի Ադրբեջանի դրոշը», - հայտարարել է Ադրբեջանի նախագահ Իլհամ Ալիևը՝ հոկտեմբերի 15-ին ելույթ ունենալով Խանքենդի քաղաքում՝ Ադրբեջանի Հանրապետության պետական դրոշը բարձրացնելուց հետո իր ելույթի ժամանակ:«Ամեն օր, ամեն ժամ մենք գնում էինք դեպի այդ սուրբ նպատակը: Մենք ամեն օր մոտեցնում էինք այդ սուրբ պահը, և ես մեկ անգամ չէ, որ ասել եմ, որ մեզնից յուրաքանչյուրն իր տեղում իր աշխատանքով պետք է մոտեցնի այդ օրը», - ասել է Ալիևը:
«Գլխավոր պատճառը, որ մենք այսօր այստեղ ենք, ադրբեջանցի ժողովուրդն է, Ադրբեջանի որդիները: Մենք այնպիսի երիտասարդ սերունդ ենք աճեցրել, որը պատրաստ էր գնալ մահվան և գնում էր հանուն հայրենիքի, հանուն հողի», - հայտարարել է Ադրբեջանի նախագահը:
Նա մեծ երջանկություն և պատմական իրադարձություն է որակել Խանքենդիում Ադրբեջանի դրոշի բարձրացումը և վստահեցրել. - «Այս հաղթանակը հավերժ կմնա մեր պատմության մեջ: Գալիք սերունդները միշտ և իրավամբ հպարտանալու են այս հաղթանակով»:
«Մենք վերականգնեցինք ադրբեջանցի ժողովրդի արժանապատվությունը: Մենք վերադարձրինք մեր հողերը, վերականգնեցինք մեր տարածքային ամբողջականությունը և միաժամանակ վերականգնեցինք մեր արժանապատվությունը», - հայտարարել է Ադրբեջանի նախագահը:
«Ես արեցի այն, ինչ ասել եմ, բոլորը գիտեն դա, այդ թվում Հայաստանում, և մոռանալ դա պետք չէ», - ընդգծել է Ալիևը՝ խորհուրդ տալով չմոռանալ Հայրենական պատերազմը, չմոռանալ հակաահաբեկչական գործողությունը. - «Եթե Հայաստանում ինչ-որ ուժ դեռ մտածում է ռևանշի մասին, թող ուշադիր դիտի այս կադրերը»:
Ալիևի խոսքով, ադրբեջանական բանտում գտնվող Ղարաբաղի երեք նախկին նախագահները, սպասում են արժանի պատժի: