ԿԱՍԻՄ ԺՈՄԱՐՏ-ՏՈԿԱԵՎ. ՂԱԶԱԽՍՏԱՆԸ ՇԱՀԱԳՐԳՌՎԱԾ Է ԱԴՐԲԵՋԱՆԻ ԵՎ ՀԱՅԱՍՏԱՆԻ ՄԻՋԵՎ ԽԱՂԱՂՈՒԹՅԱՆ ՊԱՅՄԱՆԱԳՐԻ ՇՈՒՏԱՓՈՒՅԹ ԿՆՔՄԱՄԲ
Ղազախստանը շահագրգռված է Ադրբեջանի և Հայաստանի միջև խաղաղության պայմանագրի շուտափույթ կնքմամբ, ասել է այդ երկրի նախագահ Կասիմ Ժոմարտ-Տոկաևը։«Ղազախստանը՝ որպես միջազգային խաղաղապահ նախաձեռնությունների նախաձեռնող և աջակից, պատրաստ է աջակցել ցանկացած ջանքերի՝ ուղղված ողջ եվրասիական տարածաշրջանի խաղաղ և կայուն զարգացմանը», - ասել է պաշտոնական այցով Ադրբեջանում գտնվող Տոկաևը։
Հայաստանի հետ նույն ռազմական դաշինքին անդամակցող Ղազախստանի ղեկավարը նաև գովաբանել է Բաքվին, իր բնորոշմամբ, Լեռնային Ղարաբաղի «դինամիկ վերածնման» համար։
2022-ի ամռանը Բաքու կատարած այցի ժամանակ նա հայտնել էր Ֆիզուլիում մանկական ստեղծագործական կենտրոն կառուցելու նախաձեռնության մասին։
Տոկաևը վերահաստատել է ղազախական ընկերությունների շահագրգռվածությունը՝ մասնակցելու Ղարաբաղի վերածննդին։
«Տարածաշրջանի ենթակառուցվածքների վերականգնումը կնպաստի ոչ միայն Ադրբեջանի, այլև ողջ Հարավային Կովկասի զարգացմանը», - շեշտել է Տոկաևը։