ԷԼՉԻՆ ԱՄԻՐԲԵԿՈՎ. ԲԱՔՈՒՆ ՀՈՒՅՍ ՈՒՆԻ ՄՈՏ ԱՊԱԳԱՅՈՒՄ ԽԱՂԱՂՈՒԹՅԱՆ ՀԱՄԱՁԱՅՆԱԳՐԻ ՆԱԽԱԳԾԻ ՇՈՒՐՋ ԲԱՆԱԿՑՈՒԹՅՈՒՆՆԵՐԻ ԵՎՍ ՄԵԿ ՓՈՒԼ ԱՆՑԿԱՑՆԵԼ
Բաքուն հույս ունի մոտ ապագայում խաղաղության համաձայնագրի նախագծի շուրջ բանակցությունների ևս մեկ փուլ անցկացնել Ադրբեջանի և Հայաստանի պաշտոնյաների միջև, Էստոնիայի հանրային հեռուստատեսության եթերում հայտարարել է Ադրբեջանի նախագահի հատուկ հանձնարարություններով ներկայացուցիչ Էլչին Ամիրբեկովը:«Մենք հուսով ենք, որ շուտով կկայանա բանակցությունների հաջորդ փուլը, և կվերսկսվի խաղաղ համաձայնագրի նախագծի քննարկումը, որը, ի դեպ, մշակել է Ադրբեջանն ու առաջին անգամ ներկայացրել Հայաստանին ընդամենը մեկ տարի առաջ», - ասել է Ադրբեջանի նախագահի հատուկ հանձնարարություններով ներկայացուցիչը՝ շեշտելով՝ համաձայնագրի տեքստի շուրջ բանակցությունների ֆիզիկական բացակայության ֆոնին երկու կողմերն էլ նախագծերի փոխանակումները շարունակում են՝ կողմերից յուրաքանչյուրը ներկայացնում է իր դիտողությունները և փոփոխությունները։
«Մենք, և ոչ միայն մենք, հուսով ենք, որ Ադրբեջանի կողմից տարածքային ամբողջականությունը լիովին վերականգնելուց հետո, բանակցություններում բեկումնային կետի հասնելու հնարավորությունները շատ ավելի մեծացել են»,- նշել է նա։
Ամիրբեկովը նաև ասել է, որ հաղորդակցությունների բացումը Ադրբեջանի և Հայաստանի միջև խաղաղ գործընթացի անբաժանելի մաս է։
«Բանակցությունների հիմնական ուղղությունը Բաքվի և Երևանի միջև խաղաղության համաձայնագրի տեքստի համաձայնեցումն է: Բացի հիմնական կետից, այն ընդգրկում է ևս երկուսը՝ հաղորդակցությունների բացում, ինչպես նաև Ադրբեջանի և Հայաստանի միջև պետական սահմանի սահմանազատում», - ասել է Ամիրբեկովը։
Խոսելով տրանսպորտային հաղորդակցության վերականգնումից՝ նա շեշտել է «Զանգեզուրի միջանցքը»՝ նշելով՝ «որպեսզի Ադրբեջանի քաղաքացիները կարողանան հեշտությամբ ցամաքային ճանապարհով հասնել Նախիջևան»։
«Խոսքը 42 կիլոմետր երկարությամբ երկաթգծի մասին է, որը, ցավոք, ավերվել է հակամարտության արդյունքում, խոսքը ոչ միայն բացակայող հատվածի կառուցման մասին է, ի դեպ, մեր կողմից այդ աշխատանքները գրեթե ավարտված են։ Նկատի ունեմ Հորադիզ-Ագբանդ հատվածը, ցավոք, հայկական կողմը չի էլ սկսել այս նախագծի տեխնիկական հիմնավորման աշխատանքները»,- ասել է Ամիրբեկովը։