ԱԴՐԲԵՋԱՆԻ ԱՐՏԳՈՐԾՆԱԽԱՐԱՐ ՋԵՅՀՈՒՆ ԲԱՅՐԱՄՈՎԸ ՀԱՅՏԱՐԱՐԵԼ Է, ՈՐ ԱՌԱՋԻԿԱ ՇԱԲԱԹՆԵՐԻՆ ՊԱՏՐԱՍՏՎՈՒՄ Է ՀԱՆԴԻՊԵԼ ԻՐ ՀԱՅԱՍՏԱՆՑԻ ԳՈՐԾԸՆԿԵՐՈՋ ՀԵՏ՝ ԽԱՂԱՂ ՊԱՅՄԱՆԱԳՐԻՆ ՎԵՐԱԲԵՐՈՂ ՀԱՐՑԵՐԸ ՔՆՆԱՐԿԵԼՈՒ ՆՊԱՏԱԿՈՎ
Աշխատանքային այցով Բրյուսելում գտնվող Ադրբեջանի արտգործնախարար Ջեյհուն Բայրամովը հայտարարել է, որ առաջիկա շաբաթներին պատրաստվում է հանդիպել իր հայաստանցի գործընկերոջ հետ՝ խաղաղ պայմանագրին վերաբերող հարցերը քննարկելու նպատակով։«Ադրբեջանը Հայաստանին առաջարկել է խաղաղություն հաստատել ինքնիշխանության և երկու երկրների սահմաններում տարածքային ամբողջականության ճանաչման հիմքի վրա։ Խաղաղ համաձայնագրի տեքստի շուրջ բանակցությունները մեկնարկել են։ Նոյեմբերի 7-ին,Հայաստանի ԱԳ նախարարի հետ Վաշինգտոնում կայացած բանակցությունների ընթացքում Ադրբեջանը ներկայացրել է իր վերանայված առաջարկները։ Ակնկալվում է, որ բանակցությունների հաջորդ փուլը կկայանա առաջիկա շաբաթներին», - ասել է Բայրամովը։
«Չնայած երկկողմ բանակցություններում դինամիկայի նկատվող աճին, առաջընթացը շարունակում է սահմանափակ մնալ, քանի որ Հայաստանը զբաղված է [բանակցությունների] իմիտացիայով։ Հայաստանը շարունակում է չկատարել միջպետական հարաբերությունների կարգավորման երեք հիմնական ուղղություններով ստանձնած պարտավորությունները՝ խաղաղ համաձայնագրի ստորագրում, սահմանների դելիմիտացիա և տարածաշրջանային հաղորդակցության ուղիների բացում», - նշել է Ադրբեջանի ԱԳ նախարարը։