ՄԻԱՑՅԱԼ ՆԱՀԱՆԳՆԵՐՆ ԱՋԱԿՑՈՒՄ Է ՀԱՄԱՁԱՅՆՈՒԹՅԱՆ ԿԱՅԱՑՄԱՆԸ, ՈՐԸ ԿԼԻՆԻ ՏԵՎԱԿԱՆ. ԱՄՆ ԴԵՍՊԱՆ
Միացյալ Նահանգները Ղարաբաղի ապագայի վերաբերյալ բանակցությունների արդյունքներ չի կանխորոշում, այլ աջակցում է համաձայնության կայացմանը, որը կլինի տևական, կայուն և կապահովի հիմքեր խաղաղության համար: Այս մասին հայտարարել է Հայաստանում ԱՄՆ դեսպան Քրիստինա Կվինը՝ պատասխանելով Հանրային հեռուստաընկերությանը տված հարցազրույցի ժամանակ արած հայտարարությունների վերաբերյալ հարցին։«Խնդիրների կարգավորման և տևական ու արժանապատիվ խաղաղության հասնելու ճանապարհն ուղիղ երկխոսությունն է։ Միացյալ Նահանգներն աջակցում է համաձայնության կայացմանը, որը կլինի տևական, կայուն և կապահովի հիմքեր խաղաղության համար։ Ի վերջո, չափից երկար տևած և բազմաթիվ մարդկային կյանքեր արժեցած այս հակամարտության տևական կարգավորումը երաշխավորելու միակ ճանապարհը Ղարաբաղում բնակվողների իրավունքների պաշտպանության ապահովումն է և իրենց տներում ապահովության զգացում ունենալը», - ասել է դեսպանը: