ՊԵՏՔԱՐՏՈՒՂԱՐՈՒԹՅՈՒՆ. ՊԱՇՏՈՆԱԿԱՆ ՎԱՇԻՆԳՏՈՆԸ ԲԱՔՎԻՆ ՈՒ ԵՐԵՎԱՆԻՆ ԽՆԴՐԵԼ Է ԴԻՏԱՐԿԵԼ՝ ԻՆՉՊԵՍ ԼԱՎԱԳՈՒՅՆՍ ՊԱՇՏՊԱՆԵԼ ՂԱՐԱԲԱՂԻ ԲՆԱԿՉՈՒԹՅԱՆ ԻՐԱՎՈՒՆՔՆԵՐՆ ՈՒ ԱՆՎՏԱՆԳՈՒԹՅՈՒՆԸ
Պաշտոնական Վաշինգտոնը Բաքվին ու Երևանին խնդրել է դիտարկել՝ ինչպես լավագույնս պաշտպանել Ղարաբաղի բնակչության իրավունքներն ու անվտանգությունը, փոխանցում են Միացյալ Նահանգների պետքարտուղարությունից՝ պատասխանելով «Ազատության» հարցին, թե արդյոք այս օրերին Վաշինգտոնում ընթացող հայ-ադրբեջանական բանակցություններում քննարկվո՞ւմ են Ղարաբաղին առնչվող հարցեր։«Չափազանց շատ կյանքեր խլած ու շատ երկար տևող հակամարտությանը տևական կարգավորում գտնելու միակ ճանապարհն այն է, որ ի վերջո այս մարդիկ իրենց ապահով զգան իրենց տներում, և նրանց իրավունքները պաշտպանված լինեն», - փոխանցել են ԱՄՆ արտաքին քաղաքական գերատեսչությունից, հավելելով, որ Միացյալ Նահանգները աջակցում է «երկարատև, կայուն համաձայնությանը, որը խաղաղության հիմք կարող է դնել»։