ՄԵՆՔ ԱՆՀԱՄԲԵՐ ՍՊԱՍՈՒՄ ԵՆՔ ՎԱՇԻՆԳՏՈՆՈՒՄ ԲԱՆԱԿՑՈՒԹՅՈՒՆՆԵՐԻ ԵՎՍ ՄԵԿ ՓՈՒԼ ԸՆԴՈՒՆԵԼՈՒՆ. ՊԵՏԴԵՊ
Վաշինգտոնում Հայաստանի և Ադրբեջանի արտգործնախարարների հանդիպման հետաձգումը 100 տոկոսով պայմանավորված էր ժամանակացույցի հետ կապված խնդիրներով: Այս մասին երեքշաբթի օրը ճեպազրույցում հայտարարել է Միացյալ Նահանգների Պետդեպարտամենտի խոսնակ Մեթյու Միլլերը՝ վստահեցնելով, որ հետաձգումն ամենևին չի արտացոլում «բանակցությունների վիճակը և տարբերությունները»:«Մենք անհամբեր սպասում ենք Վաշինգտոնում բանակցությունների ևս մեկ փուլ ընդունելուն, քանի որ կողմերը շարունակում են խաղաղ երկխոսությունը Հարավային Կովկասի տարածաշրջանի համար: Ինչպես նախկինում ասել ենք, մենք կարծում ենք, որ ուղիղ երկխոսությունն առանցքային է մնացած խնդիրների լուծման համար։ Կարծում ենք՝ համաձայնությունը հասանելի է», - ընդգծել է Միլլերը:
«Ակնկալում ենք, որ նոր ժամկետ կնշանակենք հանդիպման համար՝ հնարավորինս շուտ», - ասել է Պետդեպարտամենտի խոսնակը: Ի պատասխան հարցի՝ ակնկալո՞ւմ է արդյոք, որ նախարարները Վաշինգտոն կայցելեն մինչև այս ամսվա վերջ, Միլլերը հրաժարվել է կոնկրետ ժամկետ նշել: