ԻԼՀԱՄ ԱԼԻԵՎ. 2022 ԹՎԱԿԱՆԻՆ ԿՍԿՍՎԻ ՔԱՂԱՔԱՑԻՆԵՐԻ ՓՈՒԼ ԱՌ ՓՈՒԼ ՎԵՐԱԴԱՐՁԸ ՂԱՐԱԲԱՂԻ ԱԶԱՏԱԳՐՎԱԾ ՏԱՐԱԾՔՆԵՐ
Ադրբեջանի նախագահ Իլհամ Ալիևը կարծում է, որ 2022 թվականին կսկսվի քաղաքացիների փուլ առ փուլ վերադարձը Ղարաբաղի ազատագրված տարածքներ:«Հիմա ինձ համար դժվար է խոսել ժամկետների և տարեթվերի մասին: Բայց հուսով եմ, որ հաջորդ տարվանից ներքին տեղահանվածների առաջին խումբը աստիճանաբար կտեղավորվի ազատագրված տարածքներում», - ասել է Ալիևը՝ պատասխանելով «Նոր հայացք՝ դեպի Հարավային Կովկաս. հետկոնֆլիկտային զարգացում և համագործակցություն» թեմայով միջազգային խորհրդաժողովի մասնակիցների հարցին:
Նրա խոսքով՝ Ադրբեջանի իշխանությունները ցանկանում են հարկադիր տեղահանվածներին հնարավորինս շուտ վերադարձնել Ղարաբաղ: «Սակայն ամենամեծ խնդիրը ականներն են: Հայաստանը մեզ չի տրամադրել ականապատ դաշտերի քարտեզները, թեև գիտենք, որ նրանք ունեն այդ քարտեզները: Պատերազմից հետո ականի վրա պայթել են մեր ավելի քան 100 զինվորականներ և խաղաղ բնակիչներ, ավելի քան 20 մարդ զոհվել է: Ականապատ դաշտերի քարտեզների բացակայության պատճառով ականազերծումը երկար ժամանակ է պահանջում», - նշել է նախագահը:
Ալիևը նշել է, որ երկրորդ կարևոր հարցը պատճառված վնասի հաշվարկումն է, և այդ աշխատանքը սկսվել է: «Մենք նախատեսում ենք միջազգային դատարաններ հայց ներկայացնել ընդդեմ Հայաստանի: Ուստի մենք փաստագրում ենք բոլոր ավերումները», - ընդգծել է նախագահը:
Երկրի ղեկավարը հավելել է, որ այս տարածքներ քաղաքացիների վերադարձի համար անհրաժեշտ է ապահովել արժանապատիվ կենսապայմաններ, ստեղծել անհրաժեշտ ենթակառուցվածքներ: Մասնավորապես, արդեն սկսվել են տարածաշրջանում ավտոմայրուղիների և էլեկտրահաղորդման գծերի կառուցման աշխատանքները:
«Ես կցանկանայի նշել, որ Ղարաբաղի էլեկտրաֆիկացման գործընթացը տևելու է առավելագույնը 2 տարի: Անհրաժեշտ է ամեն ինչ ճիշտ պլանավորել, հաստատել քաղաքաշինության նախագծերը, աշխատանքներ են տարվում այս ուղղությամբ», - նշել է Իլհամ Ալիևը: