ՀԱՅԱՍՏԱՆԸ ԶՐԿՎԵԼ Է ՀԱՊԿ-ՈՒՄ ՁԱՅՆԻ ԻՐԱՎՈՒՆՔԻՑ, ԲԱՅՑ ԴԱՇԻՆՔԻՑ ՉԻ ՀԵՌԱՑՎԵԼ
«Որոշում է ընդունվել Հայաստանին ՀԱՊԿ-ում ձայնի իրավունքից զրկելու մասին»,- ՏԱՍՍ-ի հետ զրույցում հայտարարել է ՌԴ նախագահի մամուլի քարտուղար Դմիտրի Պեսկովը։
«Փաշինյանը բազմիցս կրկնել է, որ Հայաստանը կորցրել է ՀԱՊԿ-ի աշխատանքներին մասնակցելու հետաքրքրությունը»,- հիշեցրել էր Պեսկովը՝ վկայակոչելով Հայաստանի վարչապետի խոսքերը։
Երևանն արդեն չորրորդ տարին է՝ բոյկոտում է ռազմական դաշինքում աշխատանքները և երկրորդ տարին է՝ չի վճարում անդամավճարը, ինչն էլ ՀԱՊԿ կանոնադրության համաձայն՝ ձայնի իրավունքից զրկելու հիմք է:
Անցած շաբաթ վարչապետ Նիկոլ Փաշինյանը, արձագանքելով Հայաստանի ձայնի իրավունքի կասեցման Ռուսաստանի առաջարկի մասին ՀԱՊԿ գլխավոր քարտուղարի հայտարարությանը, կրկնել էր, որ ՀԱՊԿ-ի հետ կապված Երևանի «հետաքրքրությունները սպառված են»:
Ամիսներ առաջ էլ Փաշինյանն ասել էր, որ շատ գոհ կլինի, եթե ՀԱՊԿ-ում որոշեն Հայաստանին հեռացնել կազմակերպությունից: Այդուհանդերձ, ՀԱՊԿ-ում ցանկանում են, որ ռազմական դաշինքից դուրս գալու որոշումը Երևանը կայացնի: Նախօրեին Ռուսաստանի փոխարտգործնախարար Ալեքսանդր Պանկինն ասել էր, թե Հայաստանը փորձում է սեփական որոշումների պատասխանատվությունը բարդել ՀԱՊԿ-ի վրա՝ ընդգծելով, որ երկիրը շարունակում է մնալ կազմակերպության լիիրավ անդամ։