ՀԱՔԱՆ ՖԻԴԱՆ. ԹՈՒՐՔԻԱՆ ԵՎ ԱՄՆ-Ն ԱՋԱԿՑՈՒՄ ԵՆ ԱԴՐԲԵՋԱՆԻ ԵՎ ՀԱՅԱՍՏԱՆԻ ՄԻՋԵՎ ԽԱՂԱՂՈՒԹՅԱՆ ԳՈՐԾԸՆԹԱՑԻՆ ԵՎ ԱՄԵՆ ՋԱՆՔ ԵՆ ԳՈՐԾԱԴՐՈՒՄ ԿՈՎԿԱՍՈՒՄ ԼԱՐՎԱԾՈՒԹՅԱՆ ՍՐԱՑՄԱՆ ՌԻՍԿԵՐԸ ՆՎԱԶԵՑՆԵԼՈՒ ՀԱՄԱՐ
Թուրքիան և ԱՄՆ-ն աջակցում են Ադրբեջանի և Հայաստանի միջև խաղաղության գործընթացին և ամեն ջանք են գործադրում Կովկասում և Սև ծովում լարվածության սրման ռիսկերը նվազեցնելու համար։TRT Haber-ը հաղորդում է, որ Թուրքիայի արտաքին գործերի նախարար Հաքան Ֆիդանը այս հայտարարությունն արել է Նյու Յորքում կայացած «Թուրք-ամերիկյան հարաբերությունները 100 տարվա շեմին» թեմայով նիստում։
Իր ելույթում Ֆիդանը ընդգծել է Անկարայի և Վաշինգտոնի միջև համագործակցության կարևորությունը համաշխարհային խաղաղության և կայունության պահպանման համար։ Նա հավելել է, որ երկու երկրների գործընկերությունը նոր հնարավորություններ է ստեղծում տարածաշրջանային զարգացման և խաղաղության համար։ Ֆիդանը նաև նշել է, որ Սևծովյան տարածաշրջանը չպետք է դառնա խնդիրների աղբյուր, այլ միջազգային համագործակցության հարթակ։
Ռուս-ուկրաինական խաղաղության գործընթացի համատեքստում Ֆիդանը նշել է, որ Անկարան շարունակում է ակտիվորեն պահպանել կապերը և՛ Կիևի, և՛ Մոսկվայի հետ։ «Մենք աջակցում ենք երկխոսությանը և դիվանագիտությանը՝ Ուկրաինայում կայուն խաղաղության հասնելու համար», - հայտարարել է նախարարը։
Ֆիդանը ընդգծել է, որ հաշվի առնելով ներկայիս աշխարհաքաղաքական փոփոխությունները, անհրաժեշտ է կառուցել արդյունավետ գործընկերություն համաշխարհային տերությունների և առաջատար տարածաշրջանային դերակատարների միջև։
Թուրքիայի արտաքին գործերի նախարարը նշել է, որ նախագահ Ռեջեփ Թայիփ Էրդողանը հույս ունի, որ իր ամերիկացի գործընկեր Դոնալդ Թրամփի հետ իր հարաբերությունները կնպաստեն տարածաշրջանային համագործակցության հետագա զարգացմանը։
Հիշեցնենք, որ Թուրքիայի նախագահ Ռեջեփ Թայիփ Էրդողանը ելույթ կունենա ՄԱԿ-ի 81-րդ Գլխավոր ասամբլեայում՝ Նյու Յորքում, սեպտեմբերի 22-ին։