ԿՆԵՍՍԵԹԸ ԿԱՍԵՑՐԵԼ Է ա.կ. «ՀԱՅՈՑ ՑԵՂԱUՊԱՆՈՒԹՅԱՆ» ՎԵՐԱԲԵՐՅԱԼ ՔՎԵԱՐԿՈՒԹՅՈՒՆԸ
Իսրայելը կասեցրել է Առաջին համաշխարհային պատերազմի ժամանակ հայերի դեմ իրականացված բռնությունները որպես ցեղասպանություն ճանաչելու վերաբերյալ խորհրդարանական քվեարկությունը։ Այս մասին հայտնում է Jerusalem News Syndicate-ը՝ հղում անելով իսրայելցի պաշտոնյայի։Իսրայելի պաշտոնյան ասել է, որ խորհրդարանական վճռորոշ քվեարկությունը՝ Առաջին համաշխարհային պատերազմի ժամանակ Օսմանյան կայսրության կողմից հայերի դեմ իրականացված բռնությունները որպես ցեղասպանություն ճանաչելու վերաբերյալ, կասեցվել է։
Այս քայլն արվում է դիվանագիտական նուրբ ժամանակաշրջանում, երբ տարածաշրջանը բախվում է նոր տուրբուլենտության՝ Ծոցում Իրանի շարունակական հարձակումների պատճառով հրադադարի խզումից հետո։ Այն հաջորդում է նաև անցյալ շաբաթ Թուրքիայում կայացած ՆԱՏՕ-ի գագաթնաժողովին, որտեղ Անկարան ճնշում էր գործադրում ԱՄՆ նախագահ Դոնալդ Թրամփի վրա՝ ամերիկյան F-35 կործանիչներ ձեռք բերելու համար։
Իսրայելի կաբինետն անցյալ ամիս միաձայն հավանություն էր տվել բռնությունները որպես ցեղասպանություն որակելու առաջարկին՝ Իսրայելի դեմ Էրդողանի բորբոքիչ հռետորաբանության պատճառով Թուրքիայի հետ հարաբերությունների արագ վատթարացման ֆոնին, և Իսրայելի խորհրդարանում քվեարկություն էր նախատեսվում՝ քայլին վերջնական հավանություն տալու համար։
Քնեսեթը շաբաթվա վերջին պատրաստվում է գնալ ամառային արձակուրդի և նիստեր չի գումարի մինչև հոկտեմբերի 27-ի համապետական ընտրությունները։
Իսրայելի արտաքին գործերի նախարար Գիդեոն Սաարի խոսնակը, ով անցյալ ամիս կաբինետում ներկայացրել էր առաջարկը, կիրակի օրը չի պատասխանել մեկնաբանությունների համար արված զանգերին կամ հաղորդագրություններին։
Նախկինում Իսրայելը ձեռնպահ է մնացել դարավոր բռնությունները պաշտոնապես որպես ցեղասպանություն որակելուց, սակայն Թուրքիայի հետ հարաբերությունների ազատ անկման ֆոնին կաբինետում գնաց այդ քայլին։
Թուրքիան, որն աշխարհում Իսրայելի ամենամեծ քննադատներից է Գազայի պատերազմի հարցում, Իսրայելի կաբինետի քայլն անվանել է «քաղաքականապես մոտիվացված»։
Խորհրդարանական քվեարկությունը սառեցնելու որոշումը կարող է դիտարկվել որպես միջազգային ջանքերի մի մաս՝ ուղղված երկու երկրների միջև լարվածության նվազեցմանը տարածաշրջանային տուրբուլենտության պայմաններում։