ԲԱՔՎՈՒՄ ԿԱՅԱՑԱԾ ՆԵՈԳԱՂՈՒԹԱՏԻՐՈՒԹՅԱՆ ՎԵՐԱԲԵՐՅԱԼ ԿՈՆՖԵՐԱՆՍԻ ՄԱՍՆԱԿԻՑՆԵՐԻՆ ԻԼՀԱՄ ԱԼԻԵՎԻ ՈՒՂԵՐՁԸ ՏԱՐԱԾՎԵԼ Է ՈՐՊԵՍ ՄԱԿ-Ի ՊԱՇՏՈՆԱԿԱՆ ՓԱՍՏԱԹՈՒՂԹ
Հոկտեմբերի 20-ին Բաքվում կայացած «Նեոգաղութատիրություն. մարդու իրավունքների խախտում և անարդարություն» թեմայով միջազգային համաժողովի մասնակիցներին Ադրբեջանի նախագահ Իլհամ Ալիևի ուղերձը տարածվել է որպես ՄԱԿ-ի պաշտոնական փաստաթուղթ։Այս մասին հայտնում է Azertac-ը։
Ուղերձում Իլհամ Ալիևը հայտնել է Ադրբեջանի մտահոգությունը 21-րդ դարում գաղութատիրության շարունակման և դրա նոր դրսևորումների աճող միտումների վերաբերյալ՝ ընդգծելով, որ Ֆրանսիան օկուպացրել է Աֆրիկայի, Հարավարևելյան Ասիայի, Խաղաղօվկիանոսյան տարածաշրջանի, Լատինական Ամերիկայի տասնյակ երկրներ, թալանել նրանց հարստությունը, երկար տարիներ ստրկության մեջ է պահել այդ ժողովուրդներին, բազմաթիվ ռազմական հանցագործություններ և մարդկության դեմ հանցագործություններ է կատարել այդ տարածքներում: Նախագահը նշել է, որ Ֆրանսիայի զինված ուժերը ցեղասպանություն են իրականացրել հարյուր հազարավոր խաղաղ բնակիչների նկատմամբ՝ էթնիկ և կրոնական պատկանելության պատճառով:
Նախագահը ափսոսանք է հայտնել, որ ֆրանսիական գաղութատիրության ամոթալի մեթոդները շարունակվում են նաև այսօր և հիշեցրել, որ Ֆրանսիան աշխարհում ամենաշատ ականներ տեղադրած երկրներից է։ Իր ուղերձում Իլհամ Ալիևը հայտարարել է, որ Ադրբեջանը՝ որպես Չմիավորման շարժման նախագահ, աջակցում է գաղութատիրության դեմ պայքարող և ազատության ձգտող ժողովուրդներին։
Այն, որ Իլհամ Ալիևի ուղերձը տարածվել է որպես ՄԱԿ-ի պաշտոնական փաստաթուղթ, միջազգային հանրության կողմից միջազգային գործընթացներում Ադրբեջանի կարևոր դերին տրվող բարձր գնահատականի ակնհայտ դրսևորումն է։