ԱԴՐԲԵՋԱՆԻ ԱԳՆ. ՀԱՅԱՍՏԱՆԻ ՀԱՅՏԱՐԱՐՈՒԹՅՈՒՆՆԵՐԸ ՏԱՐԱԾԱՇՐՋԱՆՈՒՄ ՀՈՒՄԱՆԻՏԱՐ ԼԱՐՎԱԾ ԻՐԱՎԻՃԱԿԻ ՄԱՍԻՆ ՈՉ ԱՅԼ ԻՆՉ ԵՆ, ՔԱՆ ՄԱՆԻՊՈՒԼՅԱՑԻԱՆԵՐՆ ՈՒ ԱՆՕՐԻՆԱԿԱՆ ԳՈՐԾՈՂՈՒԹՅՈՒՆՆԵՐԸ ՇԱՐՈՒՆԱԿԵԼՈՒ ԱՅՍ ԵՐԿՐԻ ՄՏԱԴՐՈՒԹՅՈՒՆԸ
Չկարողանալով մարսել Ադրբեջանի Հանրապետության կողմից իր սահմանները վերահսկելու և հայկական սադրանքները կանխելու նպատակով ստեղծված Լաչինի սահմանային անցակետի գոյությունը՝ հայկական կողմը, առանց մեր երկրի հետ համաձայնեցնելու, «մարդասիրական բեռի» քողի տակ ավտոշարասյուններ է ուղարկում Ադրբեջանի ինքնիշխան տարածք, ինչը ոտնձգություն է Ադրբեջանի տարածքային ամբողջականության և ինքնիշխանության նկատմամբ և հերթական սադրանքը Լաչինի սահմանային անցակետի դեմ։Այս մասին ասված է Ադրբեջանի ԱԳՆ հայտարարության մեջ։
«Այն փաստը, որ հայկական կողմը նման քայլի գնաց Մոսկվայի բանակցություններից անմիջապես հետո, որտեղ, ի թիվս այլ հարցերի, մանրամասն քննարկվել է ներկա իրավիճակը, վկայում է այն մասին, որ այդ երկիրը անկեղծ չէ գործընթացի նկատմամբ և մտադիր է մոլորության մեջ գցել միջազգային հանրությանը՝ սրելով իրավիճակը:
Հայկական կողմի նշված սադրանքը, այդ թվում՝ հունիսի 15-ին մեր սահմանապահների գնդակոծությունը Լաչինում, մաքսանենգության փորձը, վառ օրինակ է այն բանի, որ այդ երկիրը չի հրաժարվում իր նենգ ագրեսիվ քաղաքականությունից։
Այս սադրանքը ևս մեկ անգամ ցույց է տալիս, որ Հայաստանի հայտարարությունները «տարածաշրջանում հումանիտար լարված իրավիճակի» մասին ոչ այլ ինչ են, քան մանիպուլյացիաներն ու անօրինական գործողությունները շարունակելու այդ երկրի մտադրությունը։
Չնայած այն հանգամանքին, որ ադրբեջանական կողմը ներկայացրել է մի շարք առաջարկներ, այդ թվում՝ Աղդամ-Խանքենդի ճանապարհի և այլ այլընտրանքային ուղիների օգտագործումը հայ բնակիչների կարիքները հոգալու վերաբերյալ, և այդ առաջարկներն արժանացել են Եվրոպական միության, Կարմիր խաչի միջազգային կոմիտեի աջակցությանը, հայկական կողմը դեմ է արտահայտվել բոլոր առաջարկներին, ինչպես նաև Ադրբեջանի կողմից նշված ճանապարհներով ԿԽՄԿ բեռների փոխադրմանը: Այս ամենը վկայում է, որ հումանիտար իրավիճակի վերաբերյալ նրանց հայտարարությունները քաղաքական շանտաժ են: Այս քայլերը նաև հակասում են Ադրբեջանի ինքնիշխանության և տարածքային ամբողջականության ճանաչման մասին հայտարարություններին։
Հայաստանում Եվրոպական միության դիտորդական առաքելությանը և դիվանագիտական կորպուսին որպես գործիք ներգրավելը վերոհիշյալ սադրանքին, ցույց է տալիս, որ սա նախապես ծրագրված գործողություն էր։ Մենք ևս մեկ անգամ պահանջում ենք դադարեցնել Հայաստանի կողմից նման սադրանքները»,-ասված է հաղորդագրության մեջ։