ԻԼՀԱՄ ԱԼԻԵՎ. ՄԵՐ ՔԱՂԱՔԱՑԻՆԵՐԸ ԲՌՆՈՒԹՅԱՄԲ ՎՏԱՐՎԵԼ ԵՆ ՆԵՐԿԱՅԻՍ ՀԱՅԱՍՏԱՆԻ ՏԱՐԱԾՔԻՑ ՈՉ ՄԻԱՅՆ ԶԱՆԳԵԶՈՒՐԻՑ, ԱՅԼ ՆԱԵՎ ԳՅՈՅՉԱ ՄԱՀԱԼԻ ՏԱՐԱԾՔԻՑ, ԵՎ ՆՐԱՆՔ ԻՐԱՎՈՒՆՔ ՈՒՆԵՆ ԳՆԱԼ ԵՎ ԱՊՐԵԼ ԻՐԵՆՑ ՀԱՅՐԵՆԻ ՀՈՂԵՐՈՒՄ
«Հայաստանի հայտարարությունները միանգամայն անհիմն են։ Մենք մեր հողի վրա ենք, Գարագյոլը մերն է, մյուս տարածքներն էլ մերն են։ Մենք վերադարձանք։ Այդ տարածքը 30 տարի եղել է հայերի մոտ։ Եթե սահմանն անցնում էր այն տարածքով, որի մասին խոսում էին հայերը, ապա ինչո՞ւ նրանք այնտեղ չմնացին, ի՞նչ է տեղի ունեցել։ Երբ մենք եկանք ու կանգ առանք, նրանք հայտարարեցին, որ մենք մեր տեղում չենք։ Մենք կանգնած ենք այն վայրում, որտեղ որ պետք է, և եթե ցանկանանք, կկանգնեն այն տեղերում, որտեղ կուզենք», - հայտարարել է Ադրբեջանի նախագահ Իլհամ Ալիևը:Իլհամ Ալիևը Քյալբաջարի շրջան կատարած այցի ժամանակ ասել է, որ Ադրբեջանի պաշտպանության նախարարությունը և սահմանապահ զորքերը ստեղծում են անհրաժեշտ սահմանային ենթակառուցվածքներն ու զորամասեր հայ-ադրբեջանական սահմանի երկայնքով և ամրապնդում են այդ սահմանները: Նրա խոսքով՝ պետական սահմանի ամրապնդում է ընթանում Քելբաջարի, Լաչինի և Զանգեզուրի ուղղությամբ։
Ադրբեջանի նախագահը խոսել է նաև «Զանգեզուրի միջանցքի» մասին, հայտարարելով, թե «Զանգեզուրի միջանցքի» շնորհիվ ադրբեջանցիները կվերադառնան իրենց պատմական տարածք՝ Զանգեզուր և Գյոյչա (Սևան- խմ)։
«Արևմտյան Զանգեզուրը ներկայումս գտնվում է Հայաստանի վերահսկողության տակ։ Բայց Զանգեզուրի միջանցքը, մենք, իհարկե, կօգտագործենք մեր քաղաքացիներին մեր հողեր վերադարձնելու համար։ Նման ծրագրեր կան, և դա բնական է։ Քանի որ մեր քաղաքացիները բռնությամբ վտարվել են ներկայիս Հայաստանի տարածքից ոչ միայն Զանգեզուրից, այլ նաև նրան սահմանակից Գյոյչա մահալի տարածքից, և նրանք իրավունք ունեն գնալ և ապրել իրենց հայրենի հողերում։ Մենք դա թողել ենք հաջորդ փուլին», - ասել է Ադրբեջանի նախագահը։