Համանախագահներ. «Եկել է՝ խաղաղության դիրքերից Լեռնային Ղարաբաղի հակամարտությունը լուծելու ժամանակը»
ԵԱՀԿ-ի Մինսկի խմբի համանախագահները` Ռոբերտ Բրադկեն (ԱՄՆ), Բեռնար Ֆասիեն (Ֆրանսիա) եւ Իգոր Պոպովը (Ռուսաստան), փետրվարի 8-11-ը կատարած տարածաշրջանային այցի արդյունքներով տարածել են հայտարարություն` շեշտելով, որ «եկել է խաղաղության դիրքերից Լեռնային Ղարաբաղի հակամարտությունը լուծելու ժամանակը»:
Նշելով, որ «2010 թվականի Աստրախանի գագաթնաժողովից հետո կատարված աշխատանքի արդյունքում դրական առաջընթաց է եղել»` համանախագահները հորդորում են կողմերին շարունակել առաջխաղացումը եւ թույլ տալ, որ «խաղաղ գործընթացն անցնի հաջորդ փուլ»:
Նրանք վերահաստատում են իրենց աջակցությունը կողմերին, որոնք «ընդունում են խաղաղ կարգավորմանը հասնելուն ուղղված անհրաժեշտ որոշումները»:
Տարածաշրջանային այցի ընթացքում, հիշեցնենք, միջազգային միջնորդները հանդիպումներ են ունեցել Հայաստանի եւ Ադրբեջանի նախագահների, արտգործնախարարների եւ պաշտպանության նախարարների հետ: