ԲԱՔՈՒՆ ԵՎ ԵՐԵՎԱՆԸ ՊԵՏՔ Է ՇԱՐԺՎԵՆ ԴԵՊԻ ՀԱՄԱՊԱՐՓԱԿ ԽԱՂԱՂՈՒԹՅԱՆ ՊԱՅՄԱՆԱԳԻՐ ԿՆՔԵԼՈՒՆ. ԿԵՍՏՈՒՏԻՍ ՅԱՆԿԱՈՒՍԿԱՍ
Եվրամիության և Ադրբեջանի միջև ռազմավարական գործընկերությունը կարող է էլ ավելի ընդլայնվել և ամրապնդվել: Այսօրվա դրությամբ Ադրբեջանը հանդիսանում է ԵՄ 9 երկրների ռազմավարական գործընկերը: Լավ պայմանագրային-իրավական բազան հնարավորություն կտա Բաքվին և Բրյուսելին շուտով ավարտել բանակցությունները նոր համաձայնագրի շուրջ», - CBC- ին տված հարցազրույցում հայտարարել է Ադրբեջանում ԵՄ ներկայացուցչության ղեկավար Կեստուտիս Յանկաուսկասը. «Մի քանի շաբաթ առաջ վերականգնվեցին նոր հիմնարար գործընկերության, նոր համաձայնագրի շուրջ խորհրդակցությունները: Հուսով եմ, որ դրանք կշարունակեն և հաջողությամբ և արագ տեմպերով, կարող ենք նույնիսկ համաձայնագրի շուրջ համաձայնության գալ ընթացիկ տարում»: Նոր համաձայնագիրը ոչ միայն իրավական հիմք կստեղծի ԵՄ-Ադրբեջան հարաբերությունների համար, այլ նաև կորոշի հետագա համագործակցության ուղղությունները, ընդգծել է Կեստուտիս Յանկաուսկասը: Այսօր Բաքվի և Բրյուսելի գործընկերությունն ընդգրկում է գրեթե բոլոր ոլորտները՝ կրթությունից սկսած մինչև առողջապահություն: Խոսելով Ադրբեջանի տարածքային ամբողջականության վերականգնումից հետո տարածաշրջանում նոր իրողությունների մասին, ԵՄ ներկայացուցչության ղեկավարը նշել է, որ Բաքուն և Երևանը պետք է շարժվեն դեպի համապարփակ խաղաղության պայմանագիր կնքելուն: «Ադրբեջանը պետք է ստանա բոլոր ականապատ դաշտերի քարտեզները, դրանք կօգնեն մաքրել այդ տարածքները և փրկել բազմաթիվ կյանքեր: Այժմ բարձրացվում են Ադրբեջանի և Հայաստանի սահմանի սահմանազատման խնդիրները: ԵՄ-ն այս առումով ունի հմտություններ, մեթոդաբանություն և փորձագետներ: Մենք կարող ենք միջնորդ դառնալ, օգնել հնարավորինս շուտ պայմանավորվել սահմանի շուրջ հարցերում», - ասել է Ադրբեջանում ԵՄ ներկայացուցչության ղեկավար Կեստուտիս Յանկաուսկասը: Նա վստահ է, որ Ադրբեջանը կարող է օգտվել՝ պատերազմից հետո քաղաքների ու գյուղերի վերականգնման հարցում Եվրամիության փորձից: Մասնավորապես, եվրոպական ընկերություններին հաջողվել է ներդնել խելացի տեխնոլոգիաներ: «Երբ մենք խոսում ենք խելացի գյուղի մասին, դա ոչ միայն այն է, երբ մենք ձեռքերը ծափահարելիս սենյակում լույսերը վառվում են : Դա շատ ավելին է: Դա այն հարցն է, թե ինչպես են ստեղծվում էներգետիկ ռեսուրսները, ինչպես են դրանք մատակարարվում յուրաքանչյուր տուն: Ինչպես են ստեղծվում աշխատատեղերը, տրանսպորտը, նոր տրանսպորտային միջոցներն, այսինքն՝ էլեկտրաէներգիան և ջրածինը: Թե ինչպես ենք կարգավորում թափոնները և ինչպես ենք վարվում դրանց հետ», - ասել է Յանկաուսկասը:Եվրոպացի դիվանագետն ընդգծել է, որ ընթացիկ տարվա դեկտեմբերին Բրյուսելում տեղի կունենա Արևելյան գործընկերության երկրների բարձր մակարդակի գագաթնաժողովը: Ակնկալվում է, որ միջոցառմանը Ադրբեջանը կներկայացնի նախագահ Իլհամ Ալիևը: Նշենք, որ Կեստուտիս Յանկաուսկասը ավարտում է իր դիվանագիտական առաքելությունն Ադրբեջանում: Եվրոպացի դիվանագետը Բաքվում աշխատել է 4 տարի: